A NYMPH, with ilka beauty grac'd,
Ae morning by her toilet plac'd,
Where the leal-hearted looking-glass
With truths addresst the lovely lass.
"To do ye justice, heavenly fair,
Amaist in charms ye may compare
With Venus sell. But mind: amaist.
For tho' you're happily possest
Of ilka grace which claims respect,
Yet I see faults ye should correct.
I own they only trifles are,
Yet of importance to the fair.
What signifies that patch o'er braid
With which your rosie cheek's o'erlaid?
Your natural beauties you beguile,
By that too much affected smile.
Saften that look, move ay with ease,
And you can never fail to please."
THOSE kind advices she approv'd,
And mair her monitor she lov'd,
Till in came visitants a threave.
To entertain them she maun leave
Her looking-glass. They fleetching praise
Her looks, her dress, and a' she says,
Be't right or wrang; she's hale compleat,
And fails in nathing fair or sweet.
Sae much was said, the bonny lass
Forgat her faithfu' looking-glass.
Clarinda, this dear beauty's you,
The mirror is ane good and wise,
Wha, by his counsels just, can shew
How nobles may to greatness rise.
God bless the wark. If you're opprest
By parasites with fause design,
Then will sic faithfu' mirrors best
These underplotters countermine.
A NYMPH, wi ilka beauty graced,
Ae mornin by her toilet placed,
Whair the leal-hairtit leukin-glass
Wi troths addresst the leuvely lass.
"To dae ye juistice, heivenly fair,
Amaist in chairms ye may compare
Wi Venus sell. But mind: amaist.
For tho ye're happily possest
Of ilka grace whilk claims respeck,
Yet Ah see faults ye shoud correck.
Ah awn thay anely triffles err,
Yet of importance til the fair.
What seegnifees that patch ower braid
Wi whilk yer rosie cheek's owerlaid?
Yer naitural beauties ye beguile
Bi that tae much affeckit smile.
Saften that leuk, muive aye wi ease,
An ye can niver fail ti please."
Those kind advices shae appreuved,
An mair her monitor shae leuved,
Till in cam veesitants a threave.
Ti entertain thaim shae man leave
Her leukin-glass. Thay, fleetchin, praise
Her leuks, her dress, an aw shae says,
Be't richt or wrang, shae's hyill compleat,
An fails in naethin fair or sweet.
Sae much wes sayd, the bonnie lass
Forgat her faithfu leukin-glass.
Clarinda, this dear beauty's you,
The mirror is ane guid an wise,
Wha, bi his coonsels juist, can shew
Hoo nobles may tae gretness rise.
God bless the wark. If ye're opprest
Bi parasites wi fauss design,
Than wull sic faithfu mirrors best
These unnerplotters kintramine.